Juhel er gríðarlega ósáttur við framgöngu bandarískra stjórnvalda
„Það er búið að reka mig frá borði. Ég er ekki á leiðinni til New York.“ Þetta segir velski kennarinn, Juhel Miah, í myndbandsupptöku sem hann tók upp á meðan starfsmaður Keflavíkurflugvallar fylgir honum í gegnum flugstöðina þar sem hann bíður þess að fá frekari upplýsingar.
Líkt og áður hefur komið fram var Juhel kominn um borð í farþegaþotu Icelandair sem fór til New York síðdegis þann 16. febrúar síðastliðinn. Juhel var vísað frá borði sökum þess að bandarísk stjórnvöld vildu ekki hleypa honum inn í landið.
Þá var búið að taka farangur Juhel frá borði áður en honum var tilkynnt um að hann fengi ekki að fara með vélinni.
Juhel er gríðarlega ósáttur við framgöngu bandarískra stjórnvalda í málinu og krefst þess að fá svör við því af hverju honum var meinað að koma til Bandaríkjanna.