Viki Odintcova er ein vinsælasta Instagram-stjarna Rússlands. Fylgjendur Viki, sem starfar sem fyrirsæta, hennar á þessum vinsæla samfélagsmiðli eru 3,3 milljónir talsins.
Viki komst í heimsfréttirnar á dögunum þegar myndband birtist af henni í afar hættulegum aðstæðum á einni hæstu byggingu Dúbaí í Sameinuðu arabísku furstadæmunum.
Eins og sést á meðfylgjandi myndbandi – sem er ekki fyrir lofthrædda – hélt Viki í höndina á félaga sínum meðan hún hékk fram af byggingunni. Allt var þetta gert til að ná hinni fullkomnu ljósmynd.
Ekki þarf að fjölyrða um hættuna sem Viki var í og ljóst er að ekki hefði þurft að spyrja að leikslokum hefði hún misst takið. Lögreglan í Dúbaí komst á snoðir um málið og yfirheyrði fyrirsætuna og fylgdarlið vegna málsins.
Halil Ibragim Al-Mansuri, hjá lögreglunni í Dúbaí, sagði í samtali við breska fjölmiðla að Viki hafi komið sér í mikla hættu með athæfi sínu. Henni var þó ekki refsað sérstaklega heldur látin skrifa undir yfirlýsingu þess efnis að hún myndi ekki taka upp á þessu aftur.
Sjálf hefur Viki sagt að lögreglan ætti að þakka henni fyrir þar sem hún hafi bent á að öryggismálum væri ábótavant í turninum, sem ber heitið Cayan Tower. Viki segir að hún hafi vissulega verið kvíðin vegna tökunnar en mestu máli skipti að allt hafi farið vel á endanum.