Smíði á yfir 900 íbúðum hófst á síðasta ári – Fimmta stærsta árið frá upphafi
Smíðar hófust á um 922 íbúðum í Reykjavík á síðasta ári. Árið þar á undan, 2015, hófust smíðar á 926 íbúðum og eru þessi síðustu tvö ár 50 prósent yfir meðaltali fjölda íbúða sem hafin er smíði á í borginni. Frá árinu 1972 er meðaltalið 616 íbúðir á ári.
Þetta kemur fram í nýrri ársskýrslu byggingarfulltrúans í Reykjavík fyrir árið 2016. Aðeins fjórum sinnum áður hefur fjöldi íbúða sem hafin er bygging á á einu ári verið meiri en á síðasta ári. Flestar voru þær árið 1973 en þá var hafin bygging á 1.133 íbúðum þegar Breiðholt og Árbær voru í uppbyggingu. Árið 1986 þegar Grafarvogurinn var að byggjast upp var hafin bygging á 992 íbúðum og loks árið 2005 þegar hafin var bygging á 983 íbúðum en þá voru Grafarholt og Úlfarsárdalur að byggjast upp. Árið 2015 er svo í fjórða sæti með 926 íbúðir og árið 2016 í fimmta sæti með 922 íbúðir.
Sökum þess að byggingartími nýrra íbúða er almennt um tvö til þrjú ár má gera ráð fyrir að fullgerðum íbúðum muni fjölga mikið í ár og næstu 2 ár en samkvæmt mati umhverfis- og skipulagssviðs borgarinnar eru um 1.800 íbúðir í uppbyggingu í dag. Fjöldi fullgerðra íbúða sem teknar voru í notkun í fyrra var 399 og þá voru 461 íbúð skráð á fokheldu byggingarstigi eða tilbúnar til innréttinga. Er það mesti fjöldi frá árinu 2007 þegar 573 fullgerðar íbúðir voru og 338 fokheldar.