Úrskurðað um laun bankastjóra Íslandsbanka í dag – Launin myndu lækka um 40% – Uppsagnarfrestur og gildistaka nýrra laga þýða að ekkert breytist
Laun Birnu Einarsdóttur, bankastjóra Íslandsbanka, munu ekki lækka þrátt fyrir úrskurð kjararáðs í dag um að launakjör hennar. Úrskurðurinn er sá fyrsti um laun bankastjóra Íslandsbanka síðan íslenska ríkið eignaðist bankann að fullu síðasta vor. Kjararáð ákvað að laun Birnu ættu að vera um tvær milljónir króna á mánuði með álagi og yfirvinni. Það þýðir að laun Birnu myndu lækka um ríflega 40% en samkvæmt ársreikningi Íslandsbanka fyrir árið 2015 námu laun hennar um 3,7 milljónum króna á mánuði, að undanskildum frammistöðutengdum greiðslum upp á 7,2 milljónir það ár.
Þrátt fyrir að íslenska ríkið hafi yfirtekið Íslandsbanka í fyrra þá voru kjör Birnu aldrei færð undir kjararáð sem kvað ekki upp úrskurð sinn fyrr en nú. En líkt og fram kom í umfjöllun DV um hlunnindi lykilstjórnenda Íslandsbanka í blaðinu sem kom út í dag breytir kjararáðsúrskurðurinn nú í raun engu. Ástæðan er tvíþætt.
Annars vegar þarf að segja upp núverandi ráðningarsamningi Birnu við Íslandsbanka til að færa hana undir kjararáð. Í ráðningarsamningi Birnu hjá bankanum er kveðið á um 12 mánaða uppsagnarfrest þar sem hún myndi halda óbreyttum launum þann tíma. Síðan taka taka gildi ný lög um kjararáð þann 1. Júlí næstkomandi þar sem ákvörðunarvald um laun bankstjórans flytjast aftur frá kjararáði til stjórnar bankans.
Af yfirlýsingum stjórnar bankans í úrskurði kjararáðs að dæma virðist útilokað að hún lækki laun bankastjórans jafn hraustlega og kjararáð.
Í bréfi stjórnarinnar til kjararáðs segir að Íslandsbanki hafi “ríka hagsmuni af því að geta boðið stjórnendum sínum samkeppnishæf launakjör og telur þá aðstöðu kunna að vera skaðlega fyrir bankann, eigendur hans og aðra haghafa, ef starfskjör bankastjórans séu ákvörðuð mun lakari en starfskjör undirmanna hans.”
Úrskurður kjararáðs í dag um laun bankastjóra Íslandsbanka virðist því í raun hafa verið eitthvað sem þurft hafi að gera, en muni aldrei koma til framkvæmda samkvæmt upplýsingum DV.