„Í mínum huga eru þetta vörusvik eða að minnsta kosti villandi markaðssetning,“ segir Eyjólfur Karl Eyjólfsson, fyrrverandi viðskiptavinur Eldsmiðjunnar. Eyjólfur Karl býr við hliðina á útibúi keðjunnar á Bragagötu og segist hafa verið viðskiptavinur fyrst um sinn.
Allt hafi hins vegar breyst til verri vegar þegar Foodco hf. keypti keðjuna. „Þá settu þeir upp rafmagnsofn, sem er ekki í augsýn viðskiptavina, sem varð þess valdandi að pizzurnar urðu þurrar og óspennandi,“ segir Eyjólfur Karl á Facebook-síðu sinni og birti mynd af ofninum til staðfestingar.
Talsmaður Eldsmiðjunnar svaraði kvörtun Eyjólfs á þá leið að rafmagnsofninn hafi verið í notkun frá upphafi á staðnum og væri aðeins notaður þegar mesta álagið er á veitingastaðnum. Þá eru pítsurnar forbakaðar í rafmagnsofninum en síðan kláraðar í eldofninum.
Þess ber að geta Eldsmiðjan auglýsir grimmt að staðurinn noti eingöngu alvöru eldofna og íslenskt birki úr Hallormsstaðaskógi við baksturinn. Á heimasíðu fyrirtækisins má lesa: „Það krefst kunnáttu að eldbaka pizzu því þar eru engin færibönd eða stafrænir, sjálfstýrðir hitablásarar, heldur aðeins reynsla og þekking pizzubakarans sem sér um að þú fáir pizzuna rjúkandi heita, brakandi stökka og bragðmikla úr eldofninum. Alvöru handverk eins og það hefur verið stundað frá upphafi.“