Einn lést og tveir slösuðust í hörðum árekstri jeppa og fólksbíls á Reykjanesbraut, austan við Brunnhóla, í morgun. Þetta kemur fram í tilkynningu sem lögreglan sendi frá sér skömmu fyrir hádegið.
Þar segir að lögreglu hafi borist tilkynning um slysið klukkan 6.48 í morgun, en bílarnir voru að koma úr gagnstæðri átt.
Talið er að annarri bifreiðinni hafi verið ekið yfir á rangan vegarhelming. Sá sem lést var farþegi í annarri bifreiðinni, en ekki er hægt að greina frá líðan ökumannanna að svo stöddu.
Lögreglan á höfuðborgarsvæðinu og rannsóknarnefnd samgönguslysa rannsaka slysið.