Yfirvöld í Sameinuðu arabísku furstadæminum eru stórhuga þegar kemur að áætlunum um nýlenduvæðingu á svæðum í geimnum. Ef allt gengur að óskum gæti fyrsta borgin risið á plánetunni Mars áður en árið 2117 gengur í garð.

IFLScience fjallaði um þetta verkefni yfirvalda á dögunum.

Eins og gefur að skilja er vinnan aðeins á hugmyndastigi enda er það ýmsum vandkvæðum bundið að komast til Mars, hvað þá byggja þar stórborg. Samkvæmt þeirri hugmyndavinnu sem þó er komin af stað myndi borgin verða nokkuð stór, eða álíka stór og Chicago í Bandaríkjunum.

Þrívíddarmyndir af hinni draumkenndu stórborg voru sýndar á ráðstefnu, sem bar yfirskriftina World Government Summit, í Dúbaí í janúarmánuði.

Sheikh Mohammed bin Rashid Al Maktoum, varaforseti furstadæmanna, sagði á ráðstefnunni að metnaður mannkyns ætti sér engar takmarkanir, aðeins þyrfti að líta til tækniframfara síðustu alda og áratuga til að sjá að allt er hægt.

Á kynningunni kom fram að 600 þúsund manns gætu búið í borginni. Mörgum spurningum er þó ósvarað, eins og til dæmis hvernig eigi að ferja allan þennan fjölda til plánetunnar. Það mun væntanlega koma í hlut vísindamanna framtíðarinnar til að svara þeirri spurningu.

Sameinuðu arabísku furstadæmin er tiltölulega nýfarin að láta sig geimferðamál varða. Árið 2014 var fyrsta geimferðastofnun furstadæmanna, sem samanstanda af sjö furstadæmum á suðausturhorni Arabíuskagans, stofnuð. Stofnunin vinnur nú að því að koma ómönnuðu geimfari til Mars og stefnir á að gera það áður en árið 2021 gengur í garð.