Útlit er fyrir að eitthvað muni snjóa í flestum landshlutum á miðvikudag og fimmtudag. Þá verður austlæg átt ríkjandi og hiti verður líklega undir frostmarki. „Það er semsagt útlit fyrir að við fáum sýnishorn af vetri í þessari viku,“ segir í hugleiðingum veðurfræðings á vef Veðurstofunnar.

Þetta vetrarveður mun þó ekki vara lengi því seinni part föstudags má búast við suðaustanstormi. Líklega hlýnar nægilega mikið um kvöldið á sunnanverðu landinu þannig að úrkoma verður í formi slagveðursrigningar. Í öðrum landshlutum gæti orðið hríðarveður.

Veðurstofan býst við vestan strekkingi í dag en hægari vindi norðanlands. Víða verða snjóél og hiti um frostmark en nærri ströndinni á sunnanverðu landinu verður hlýrra og úrkoman þar í formi rigningarskúra.

„Í kvöld dregur úr vindi og úrkomu. Í fyrramálið verður lægð skammt sunnan við land. Henni fylgir allhvöss austanátt sunnanlands með slyddu eða snjókomu og úrkoman færist síðan yfir á austanvert landið þegar líður á daginn og vindur verður norðlægari. Á Vesturlandi rofar til og gæti sést til sólar, sem er tilbreyting frá þokunni sem var um helgina,“ segir á vef Veðurstofunnar.

Veðurhorfur á landinu næstu daga

Á miðvikudag og fimmtudag:
Austlæg átt, víða 8-13 m/s og snjókoma eða él. Frost 0 til 8 stig, kaldast í innsveitum NA-lands.

Á föstudag:
Vaxandi suðaustanátt og dálítil snjókoma, en þurrt N-lands. Hægt hlýnandi veður. Suðaustan 18-23 og snjókoma undir kvöld, en rigning eða slydda sunnan heiða og frostlaust þar.

Á laugardag:
Hvöss suðaustanátt NA-lands fram eftir degi, annars hægari vindur. Víða rigning, en snjókoma eða él og kólnar seinni partinn, fyrst SV-til.

Á sunnudag:
Austlæg átt og él, en bjartviðri N-til á landinu. Frost 0 til 7 stig.