Donald Trump Bandaríkjaforseti hefur tjáð sig um Svíþjóðarummælin umdeildu sem hann lét falla á fundi með stuðningsmönnum sínum á laugardag. Á fundinum varði Trump þá ákvörðun sína að hindra komu flóttamanna frá múslimaríkjum til Bandaríkjanna.
„Sjáið bara hvað er að gerast í Þýskalandi. Sjáið hvað gerðist í Svíþjóð í gærkvöldi,“ sagði Trump sem virtist vera að lýsa einhverju atviki í Svíþjóð á föstudagskvöld. „Svíþjóð. Hver hefði trúað því? Svíþjóð. Þeir hafa tekið við miklum fjölda og eiga í vandræðum.“
Staðreyndin er sú að allt var með kyrrum kjörum í Svíþjóð á föstudag og vöktu ummælin þar af leiðandi mikla athygli.
Trump sagði á Twitter-síðu sinni í gærkvöldi að hann hefði verið að vísa í umfjöllun á Fox News um stöðu mála í Svíþjóð. Hann hefði verið að tala á almennu nótunum en ekki verið að vísa í sérstakt atvik. Í umfjöllun Fox News var rætt við kvikmyndagerðarmanninn Ami Horowitz sem sagðist telja að flóttamenn tengdust aukinni tíðni afbrota í Svíþjóð.
Í umfjöllun Guardian er bent á það að afbrotatíðni hefur haldist nær óbreytt í Svíþjóð síðastliðin 10 ár.