„Stjórn Ungra Pírata lýsir yfir miklum áhyggjum af forgangsröðun og áherslum heilbrigðisráðherra í heilbrigðismálum. Þá kemur það okkur algjörlega í opna skjöldu að heilbrigðisráðherra vilji að rafrettur heyri undir sömu lög og almennt tóbak.“
Þannig hefst yfirlýsing frá stjórn Ungra Pírata vegna forgangsröðunar heilbrigðisráðherra í heilbrigðismálum. Í yfirlýsingunni segir:
„Það er af mörgum stórum málum að taka í heilbrigðiskerfinu, en frá árinu 2003 hefur fjársvelti og niðurskurður verið lýsandi fyrir stefnu stjórnvalda. Yfirlýsingar Óttarrs Proppé um að engar stefnubreytingar verði frá þeirri stefnu sem Sjálfstæðisflokkurinn hefur markað veldur stjórn Ungra Pírata áhyggjum og við skorum á ráðherra að einbeita sér að því að auka gæði heilbrigðisþjónustunnar, tryggja velferð sjúklinga og ánægju heilbrigðisstarfsfólks, eins og Píratar lögðu til í aðdraganda alþingiskosninga 2016.“
Segir Píratar að Óttar hafi kosið að eyða tíma sínum frekar í rafrettur og það þrátt fyrir að rannsóknir bendi á að þær séu hættuminni en venjulegar sígarettur. Hafi Óttar lýst yfir að hann vilji flokka þær með hefðbundnu tóbaki.
„Við fordæmum þessa vanhugsuðu forræðishyggju, sem mun væntanlega leiða til þess að færri láti af reykingum en ella og mun því ekki draga úr krabbameinstilfellum. Læknar hafa kallað eftir skýrum reglum, en ekki því að eitt helsta hjálpartæki fólks sem vill hætta að reykja verði hækkað í verði, gert óaðgengilegra og úthýst úr almannarými á svipaðan hátt og hefur verið gert með sígarettur sem þátt í tóbaksvörnum.“
Segir ungir Píratar að tillaga Óttars beri vott um slaka forgangsröðun í heilbrigðismálum.
„Við fordæmum þessa tillögu og skorum á ráðherra að kynna sér rannsóknir í tóbaksvarnamálum betur og forgangsraða rétt í heilbrigðismálum.“
Undir yfirlýsinguna skrifa:
„Dóra Björt Guðjónsdóttir, Ásmundur Guðjónsson, Jóhanna Gísladóttir, Karl Héðinn Kristjánsson og Viktor Orri Valgarðsson.“