Fangar á Haíti búa við skelfilegar aðstæður
„Að vera í fangelsi á Haíti gerir mann brjálaðan ef það drepur þig ekki fyrst. Þetta er hreinasta helvíti,“ segir Vangeliste Bazile, fangi á Haíti, í samtali við AP-fréttastofuna.
Staða fangelsismála í landinu er skelfileg en í umfjöllun AP kemur fram að fangar hafi dáið af völdum vannæringar innan fangelsa landsins.
Vangeliste er í hópi um fimm þúsund fanga sem sitja í fjölmennasta fangelsi landsins. Talið er að um 80 prósent þeirra bíði dóms.
Fangar í umræddu fangelsi búa við mjög þröngan kost; mun fleiri fangar eru í fangelsinu en upphaflega stóð til, smitsjúkdómar herja á fanga og þá virðist ekki vera til nægur matur handa föngum. Margir fangar reiða sig á mat frá vinum og ættingjum en sumir eru ekki svo heppnir að eiga aðstandendur sem geta séð þeim fyrir mat.
Í umfjöllun AP kemur fram að eftirlitsaðilar séu uggandi vegna stöðu mála á Haíti. „Ég hef aldrei séð jafn slæmt ástand. Þarna eru fleiri að deyja ótímabærum dauðdaga en ég hef séð annars staðar í heiminum,“ segir Dr. John May, forsvarsmaður góðgerðarsamtakanna Health Through Walls.
Ekki nóg með að matur sé af skornum skammti heldur er aðgangur að hreinu drykkjarvatni takmarkaður. Fangelsisyfirvöld segja að þau geri sitt besta en fjármagn frá hinu opinbera sé skorið við nögl.