Sænska lögreglan ræðst gegn barnaníðshring – Átta karlmenn handteknir – Viðbjóðslegar lýsingar á brotum
Sænska lögreglan hefur handtekið átta karlmenn sem grunaðir eru um að vera hluti af stórum barnaníðshring. Mennirnir eru á aldrinum 50 til 70 ára og hefur sænska lögreglan fylgst með þeim svo vikum skiptir, hlerað síma og rafræn gögn. Mennirnir mun hafa lýst á viðbjóðslegan hátt hvernig níðast skuli á börnum og myrða þau með kvalafullum hætti. „Þetta eru hreinar pyntingar,“ segir heimildarmaður innan lögreglunnar. Ekki er þó ljóst hvort mennirnir hafa lýst ímyndunum sínum eða hvort þeir hafi gerst sekir um brotin.
Sænska dagblaðið Dagens Nyheter greinir frá. Handtökurnar fóru fram á miðvikudag og fimmtudag í vikunni víðs vegar um Mið-Svíþjóð. Mennirnir eru grunaðir um mjög gróf brot, svo gróf að heimildir herma að annað eins hafi ekki áður sést í Svíþjóð.
Mennirnir munu hafa verið í sambandi í gegnum símafundi þar sem þeir hafa lýst hræðilegum hlutum. Sænsk lögregluyfirvöld hafa skipulagt aðgerðirnar svo vikum skiptir en rannsóknin hefur staðið frá því í fyrrahaust. Þá fengu sænsk lögregluyfirvöld ábendingar um brot eins mannanna en sá hafði áður verið grunaður í rannsókn á kynferðisbroti gegn barni. Sú rannsókn var þó látin niður falla.
Sem fyrr segir hefur lögregla meðal annars hlerað símtöl mannanna sem um ræðir og hafa samtölin snúist um viðbjóðsleg brot gegn börnum, þar á meðal svokallaðar „snuff-kvikmyndir“, en í þeim ættu fórnarlömb, í þessu tilviki börn, að vera myrt með kynferðisofbeldi. Þá munu mennirnir hafa rætt um að „panta“ börn frá útlöndum til að níðast á.