Eftirlitsstofnun í Þýskalandi hefur hvatt foreldra þeirra barna sem eiga svokallaðar Cayla-dúkkur að henda þeim beinustu leið í ruslið. Ástæðan er brestur í hugbúnaði dúkkunnar sem gæti gert óprúttnum aðilum kleift að tala við börnin í gegnum þær.

Þetta kemur fram í frétt BBC

Stofnunin sem um ræðir, Bunesnetzagentur, hefur eftirlit með fjarskiptamálum í Þýskalandi og að mati forsvarsmanna þar er dúkkan talin óörugg. Í frétt BBC kemur fram að hakkarar gætu nýtt sér galla í Bluetooth-búnaði dúkkunnar til að hlusta á og koma skilaboðum áleiðis til þeirra barna sem leika sér með dúkkuna.

Forsvarsmenn The Vivid Toy group, fyrirtækisins sem framleiðir My Friend Cayla-dúkkurnar, hafa áður fullyrt að einangruð tilvik hafi komið upp þar sem þetta var hægt. Þetta hafi þó verið framkvæmt af sérfræðingum og ekki séu til dæmi þess að óprúttnir aðilar hafi nýtt sér þessa glufu.

Engu að síður segja sérfræðingar sem BBC ræddi við að þó að um einangruð tilvik hafi verið að ræða sé möguleikinn fyrir hendi. Ekki sé búið að lagfæra þennan galla.

Dúkkurnar eru þannig úr garði gerðar að þær geta brugðist við spurningum þeirra sem leika með þær, að því gefnu að nettenging sé til staðar. Til dæmis getur barn spurt: „Hvað kallast litlir hestar?“ Þá getur dúkkan svarað: „Þeir kallast folöld.“

Fyrst var bent á hugbúnaðargallann í Caylu-dúkkunum í janúar 2015.