Almennt er samþykkt að heimsálfurnar séu sjö talsins, Afríka, Asía, Eyjaálfa (Ástralía), Norður-Ameríka, Suður-Ameríka og Antartíka eða Suðurskautslandið. En vísindamenn vilja nú fjölga heimsálfunum í átta með því að telja með Sjálandíu.

Sjálandía er landssvæði sem að langmestu leyti er undir sjávarmáli í suðvestur Kyrrahafi, um fimm milljónir ferkílómetra að stærð. Eini hluti svæðisins sem stendur upp úr sjó er Nýja-Sjáland. Vísindamenn halda því nú fram að svæðið uppfylli skilyrði þess að teljast heimálfa og vilja að það verði viðurkennt.

Í grein sem birt var í Geological Society of America’s Journal, er Sjálandíu svo lýst að um sé að ræða landmassa sem sé um fimm milljónir ferkílómetra, um tveir þriðju af stærð meginlands Ástralíu. Um 94 prósent svæðisins sé undir vatni og aðeins nokkrar eyjar standi upp úr, auk þriggja stærri landsvæða. Það eru Norður- og Suður-Eyjar Nýja Sjálands og Nýja-Kaledónía.

Þrátt fyrir að Sjálandía sé að langmestu leyti undir vatni benda vísindamenn á atriði sem að svæðið uppfylli og séu til marks um að telja megi það til heimsálfu. Þannig sé landsvæðið hærra en nærliggjandi svæði, jarðfræði þess hafi ákveðin sérkenni, um vel skilgreint svæði sé að ræða og jarðskorpan á svæðinu sé þykkari en venjulegur hafsbotn.

Engin nefnd vísindamanna er til sem viðurkennir heimsálfur sérstaklega, ólíkt því sem til að mynda má segja um reikistjörnur. Alþjóðasamband stjarnfræðinga ákvað til að mynda árið 2006 að endurskilgreina Plútó sem dvergplánetu og missti hún þar með stall sinn sem ein af reikistjörnum sólkerfis okkar. Hvað varðar Sjálandíu er það í raun á valdi rannsakenda og vísindamanna vítt og breitt um heiminn að samþykkja með tímanum að svæðið teljist heimsálfa. Nú eða ekki.