Dómstóll í Osló hefur dæmt þrjá í fangelsi vegna veðmálasvindls sem átti sér stað í tveimur leikjum í norsku þriðju deildinni í knattspyrnu sumarið 2012.

Tveir þeirra sem hlutu dóm eru fyrrverandi leikmenn; Drin Shala, fyrrverandi markvörður Follo, og Alban Shipsani, fyrrverandi framherji Asker. Báðir voru þeir dæmdir í fjórtán mánaða fangelsi.

Leikirnir sem um ræðir fóru fram í júní 2012. Í öðrum leiknum tapaði Follo, sem Shala lék með, 4-3 fyrir Østsiden. Liðið var með 3-0 forystu þegar 25 mínútur voru eftir af leiknum. Í hinum leiknum tapaði Asker 7-1 fyrir Frigg Oslo þrátt fyrir að flestir hefðu búist við sigri Asker.

Norska knattspyrnusambandið fór þess á leit við lögreglu að þessir tveir leikir yrðu rannsakaðar vegna gruns um veðmálasvindls. Í ljós kom að óvenjulega miklum fjármunum hafði verið veðjað á þessa tvo leiki.

Rannsókn lögreglu leiddi til þess að sjö voru ákærðir; leikmennirnir tveir og braskari sem hlaut tveggja og hálfs árs fangelsisdóm vegna málsins. Sá hafði unnið 340 þúsund norskar krónur, 4,5 milljónir króna á núverandi gengi, með því að veðja á leikina tvo.

Hinir fjórir sem voru ákærðir voru sýknaðir.