Foreldrar sitja um vefinn til að tryggja pláss á frístundaheimili næsta haust
Mínar síður – Rafræn Reykjavík liggur niðri vegna kerfisbilunar. Gríðarlegt álag hefur verið á vefnum í morgun en frá og með deginum í dag geta foreldrar tekið frá pláss fyrir börnin sín á frístundaheimilum borgarinnar fyrir næsta vetur. Innritun fyrir veturinn 2017 til 2018 átti að hefjast klukkan 8.20 í morgun.
Börnin eru tekin í þeirri röð sem foreldrar þeirra sækja um plássið á Rafrænni Reykjavík. Því myndist yfirleitt mikil umferð á vefinn sökum þess að erfiðlega hefur gengið að manna störf á frístundaheimilum síðustu ár.
Því getur það skipt miklu máli hvort foreldri skráir barnið sitt fyrir hádegi eða eftir hádegi, þennan dag, upp á það hvenær barnið fær pláss á frístundaheimili í haust.
Börn í 1. bekk fá forgang en síðasta haust lentu fjölmargir foreldrar í vandræðum þegar eldri börn fengu ekki pláss strax sökum manneklu.
Unnið er að lagfæringu og á vefsvæði Reykjavíkurborgar er beðist velvirðingar á þeim óþægindum sem þetta veldur. Ekki er vitað hvenær vefurinn kemst í lag aftur.