21 af þeim starfsmönnum sem koma að skipulagi og undirbúningi Eurovision keppninnar í Kiev í Úkraínu hafa sagt upp störfum. Í hópnum eru meðal annars tveir yfirframleiðendur. BBC greinir frá þessu.
Starfsmennirnir voru ráðnir af úkraínska ríkissjónvarpinu en í opnu bréfi frá þeim kemur fram að allur undirbúningur hafi stöðvast eftir að nýr samhæfingarstjóri var ráðinn í desember síðastliðnum og hópnum hafi verið haldið fyrir utan allar ákvarðanatakanir.
Í bréfinu segjast starfsmennirnir hafa verið fullkomlega hindraðir í því að taka nokkrar ákvarðanir varðandi keppnina sem á að fara fram þann 13.maí næstkomandi.
Þá kemur fram í frétt BBC að talsverð vandræði hafi verið í kringum undirbúning keppninnar að undanförnu, en meðal annars hefur kostnaðurinn við keppninna verið aukinn um tæplega 7 milljónir evra. Samtök evrópskra sjónvarpsstöðva hafa ítrekað við úkraínska ríkissjónvarpið að það verði að halda fyrri áætlunum þrátt fyrir þær aðstæður sem hafa skapast.
Í samtali við RÚV segir Skarphéðinn Guðmundsson, dagskrárstjóri að bakland keppninnar sé traust og fylgst verði grannt með framgangi mála í Úkraínu. Þannig muni RÚV vera í sambandi við forsvarsmenn keppninnar til að kalla eftir frekari upplýsingum um stöðuna sem upp er komin.
