Gentle Giants kvartaði undan markaðssetningu Norðursiglingar
Norðursiglingu hefur verið bannað að nota slagorðið „Carbon Neutral“ í auglýsingum sínum. Þetta kemur fram í ákvörðun Neytendastofu sem barst kvörtun frá keppinauti Norðursiglingar, Gentle Giants Hvalaferðir. Í kvörtuninni kom fram að um villandi markaðssetningu væri að ræða.
„Neytendastofa taldi að fullyrðingar sem vísi til jákvæðra eða hlutlausra umhverfisáhrifa vara eða þjónustu verði að vera settar fram á skýran, nákvæman og ótvíræðan hátt og studdar fullnægjandi gögnum. Að mati Neytendastofu var notkun Norðursiglingar á slagorðinu víðtæk og áberandi þrátt fyrir að aðeins hluti starfseminnar gæti talist án útblásturs koldíoxíðs. Taldi Neytendastofa því að um væri að ræða villandi og óréttmæta viðskiptahætti,“ segir í áliti Neytendastofu.
Var Norðursiglingu því sem fyrr segir bannað að nota slagorðið.