Tvær konur hafa verið dæmdar fyrir að stela miklu magni af fötum frá Hjálpræðishernum á Akureyri. Konurnar voru ákærðar þann 11. janúar en þjófnaðurinn átti sér stað aðfaranótt laugardagsins 1. október 2016.
Konurnar fóru saman í fatasöfnunarkassa hjá Hertex en kassinn er á vegum fata- og nytjamarkaðar á vegum Hjálpræðishersins við Hrísalund 1 B á Akureyri. Þar stálu þær miklu magni af fatnaði. Hjálpræðisherinn fær fatnaðinn að gjöf og selur til að fjármagna starfsemi félagsins. Konurnar sáust á eftirlitsmyndavél.
Konurnar játuðu brot sín. Þær hafa ekki áður gerst brotlegar við lög. Sögðust þær báðar sjá eftir að hafa stolið frá Hjálpræðishernum. Konurnar hlutu skilorðsbundin dóm og þurfa að greiða rúmar 200 þúsund í málskostnað.
