Snör viðbrögð urðu manni sem fór niður um ís til bjargar
Manni sem fór niður um ís á Maridalsvatni skammt norður af Osló var bjargað með því að komið var til hans barka sem notaður er til að tæma rotþrær. Atvikið átti sér stað síðastliðinn föstudag og urðu snögg viðbrögð til þess að maður slapp óskaddaður, þó kaldur væri, frá volkinu.
Félagarnir Tom og Jesper, sem keyra tankbíl og sjá um að tæma rotþrær á svæðinu, voru á ferðinni um eittleytið eftir hádegi síðastliðinn föstudag þegar þeir sáu manninn í vatninu, um 10 til 15 metra frá landi. „Við sáum bara höfuð og hendur sem stóðu upp úr vatninu. Það var ekkert annað að gera en að nauðhemla og stöðva bílinn,“ segir Tom.
Þeir félagar stukku út úr bílnum og duttu strax niður á lausn sem líkast til bjargaði manninum. Aftan á tankbílnum er 60 metra langur barki á hjóli sem þeir ákváðu að koma til mannsins. Jesper klifraði með barkann yfir girðingu sem var við veginn og tókst að kasta honum til mannsins sem náði taki á barkanum og gat haldið sér þar til að lögregla og sjúkralið kom á staðinn. „Við höfðum ekki tíma til að hugsa málið, við urðum að bregðast við,“ segir Tom.
Maðurinn í vatninu, sem er á sextugsaldri, var færður á sjúkrahús vegna ofkælingar en hann var þó, að sögn lögreglu, í góðu ástandi að öðru leyti. Talið er að hann hafi verið í vatninu í um korter.