Loftslagsbreytingar stefna mörgum af fegurstu stöðum jarðar í hættu
Margir af fegurstu stöðum jarðar eiga á hættu að heyra sögunni til. Flestir þessara staða eru í hættu vegna loftslagsbreytinga á jörðinni, hlýnunar jarðar og þar með hækkandi yfirborðs sjávar. Hér má sjá nokkur dæmi um slíka staði en tekið skal fram að úttektin er alls ekki tæmandi.
Seychelles-eyjar eru sannkölluð paradís á jörðu og vinsæll áfangastaður meðal ferðamanna. Seychelles-eyjar eru í Indlandshafi skammt frá Madagaskar. Strandrof (e. beach erosion), það er aukinn ágangur sjávar á eyjarnar, mun gera að verkum að þær muni dag einn fara í kaf. Svörtustu spár gera ráð fyrir því að það muni gerast á næstu 50–100 árum.
Kilimanjaro-fjall í Tansaníu er hæsta fjall Afríku og því ekki hætta á að það hverfi. Það sem flestir göngumenn, sem farið hafa á fjallið, tala um er hversu einstakt það er að ganga af stað úr regnskógi við rætur fjallsins og enda svo á snævi þöktum fjallstindinum. Hækkandi hitastig á jörðinni hefur gert að verkum að ísbreiðan á toppi fjallsins hefur minnkað ár frá ári. Á árunum 1912 til 2007 minnkaði hún um 85 prósent.
Sundarbans-fenjasvæðið teygir sig yfir stórt svæðið vestast á suðurströnd Bangladess og austast á suðurströnd Indlands. Um er að ræða gríðarstórt skóglendi sem jafnframt er heimkynni fjölmargra dýra í útrýmingarhættu, til dæmis tígrisdýra. Mengun, hækkandi yfirborð sjávar og aukinn ágangur í náttúrulegar auðlindir hefur stefnt Sundarbans-fenjasvæðinu í mikla hættu.
Patagónía er stórt landsvæði í suðurhluta Suður-Ameríku. Patagónía er vinsæll áfangastaðir ferðamanna enda þykir náttúrufegurð mikil á þessum syðsta odda álfunnar. Jöklarnir í Patagóníu hafa löngum verið aðdráttarafl en þeir hafa minnkað mikið á undanförnum áratugum vegna hækkandi hitastigs og minni úrkomu.
Túvalú er lítill eyjaklasi í Pólýnesíu í Kyrrahafi sem situr á milli Ástralíu og Hawaii. Líkt og á við um fleiri eyríki, sem standa lágt yfir sjávarmáli, er Túvalú mikil hætta búin. Íbúar á Túvalú eru aðeins um tíu þúsund talsins sem gerir ríkið að þriðja fámennasta sjálfstæða ríki jarðar á eftir Vatíkanínu og Nárú.
Amazon-regnskógurinn er ógnarstór og nær yfir 5,4 milljóna ferkílómetra svæði. Það gerir hann að stærsta regnskógi í heimi. Þarna eru heimkynni gríðarlegra margra dýra- og plöntutegunda sem eru í mikilli hættu vegna skógarhöggs á stórum svæðum. Ásókn í land til landbúnaðar er mikil á svæðinu og ef fer sem horfir verður Amazon-regnskógurinn ekki svipur hjá sjón innan fárra áratuga.
Loftslagsbreytingar munu hafa mikil áhrif á Evrópu og þá sérstaklega hæstu punkta álfunnar, þar á meðal Alpafjöll. Alpafjöll eru gríðarstór fjallgarður sem teygir sig um 1.200 kílómetra frá Austurríki og Slóveníu í austri til Ítalíu, Sviss, Þýskalands og Frakklands í vestri. Alparnir standa heldur lægra en aðrir stórir fjallgarðar í heiminum og er þar af leiðandi frekar hætta búin vegna loftslagsbreytinga. Fullyrt hefur verið að Alparnir tapi sem nemur þremur prósentum af jöklum sínum á hverju einasta ári og það endar bara á einn veg.