Ný skoðanakönnun Fréttablaðsins sem sýnir 78 prósenta stuðning við ríkisstjórnina kemur eins og himnasending fyrir Katrínu Jakobsdóttur. Hluti af hennar eigin flokksmönnum snerust gegn henni þegar hún hóf stjórnarmyndunarviðræður við Sjálfstæðisflokkinn og Framsóknarflokkinn. Katrín hafði þó sitt fram og sannaði sig sem leiðtogi. Nú er að sjá hvort niðurstaða þessarar könnunar verði til þess að villikettirnir innan Vinstri grænna hafi hægt um sig eða fari á stjá og geri formanninum áfram lífið leitt. Hvað sem verður ætti Katrín að vera hæstánægð með góðan stuðning hjá þjóðinni.