Ekki er ýkja langt síðan talið var að framtíð Dags B. Eggertssonar í stóli borgarstjóra væri tvísýn. Nú er staðan nokkuð breytt. Dagur birtist mjög víða, sást til dæmis á sjónvarpsskjáum stinga sér tignarlega til sunds eftir endurbætur á Sundhöll Reykjavíkur. Hann er líka að leggja fram mál sem líklega eru til vinsælda fallin, það nýjasta snýr að ókeypis námsgögnum í grunnskólum Reykjavíkur. Á meðan gerist lítið hjá andstæðingum Dags í Sjálfstæðisflokknum. Þar er leitað ljósum logum að nýjum leiðtoga sem komið getur atkvæðum í hús en talið er næsta víst að enginn sitjandi borgarfulltrúa hafi styrkleika til að fella Dag. Þessi leiðtogaleit hefur staðið lengi yfir án árangurs. Á meðan baðar hinn geðfelldi borgarstjóri sig í sviðsljósinu.