Lögregluyfirvöld í Kaliforníu í Bandaríkjunum leita að manni sem slapp úr fangelsi á miðvikudag. Maðurinn sem um ræðir er 55 ára og heitir Frederick Berg en hann var í fangelsi eftir að haft rúmar hundrað milljónir dala, rúma tíu milljarða króna, af fólki með Ponzi-svikamyllu.

Það var á miðvikudag að fangaverðir í litlu lágmarksöryggisfangelsi í Atwater urðu þess varir að Berg væri á bak og burt. Ekki liggur fyrir hvernig honum tókst að flýja úr fangelsinu.

Berg var dæmdur í 18 ára fangelsi árið 2012 eftir að hafa játað á sig fjársvik og peningaþvætti. Um var að ræða stærsta fjársvikamál sem komið hafði upp í vesturhluta Washington-ríkis, þar sem Berg var búsettur á sínum tíma.

Óhætt er að segja að Berg hafi lifað lúxuslífi með þeim peningum sem hann fékk með sviksamlegum hætti. Hann keypti sér snekkju, nokkur glæsihús og einkaþotu en brotin stóð yfir í um áratug.