Nýlega stóðu læknar á sjúkrahúsi í Flórída í Bandaríkjunum frammi fyrir erfiðu siðferðislegu mati þegar sjúkraflutningsmenn komu með meðvitundarlausan sjötugan mann sem átti í öndunarörðugleikum. Mikið magn áfengis mældist í blóði mannsins og hann var skilríkjalaus og því var ekkert vitað um hver hann væri.
Þegar læknar höfðu tekið við manninum á Jackson Memorial sjúkrahúsinu í Miami uppgötvuðu þeir fljótt að á bringu mannsins var húðflúr með textanum: „Do Not Resuscitate“ (Endurlífgið ekki) og þar fyrir neðan undirskrift sem læknarnir töldu vera undirskrift mannsins.
Nýlega var fjallað um málið í vísindaritinu New England Journal of Medicine. Í yfirlýsingu lækna, sem voru að störfum þegar komið var með manninn, kemur fram að húðflúrið hafi skapað meiri óvissu en vissu um hvað ætti að gera. Læknarnir segja að þeir hafi í byrjun ákveðið að fara ekki eftir fyrirmælum húðflúrsins á grunni þess að þá væru þeir að taka ákvörðun um óafturkræfa leið samtímis og ákveðin óvissa ríkti um fyrirmælin.
En síðan íhugðu þeir ákvörðun sína aftur á þeim grunni að sjúklingurinn hefði líklega gengið mjög langt í að tryggja að skilaboð hans og vilji myndu skiljast og að orðið „Not“ var undirstrikað. Einnig töldu læknarnir það styrkja boðskap húðflúrsins að nafn mannsins var húðflúrað fyrir neðan.
Læknarnir báðu því um siðferðislega ráðgjöf áður en þeir tóku endanlega ákvörðun. Á meðan fékk sjúklingurinn grunn meðhöndlun. Siðferðislegir ráðgjafar ráðlögðu læknunum síðan að fara eftir því sem húðflúrið sagði enda „væri sanngjarnt að álykta að húðflúrið skýrði frá vilja mannsins“.
Læknarnir fylgdu ráði ráðgjafanna og maðurinn lést um nóttina.
Nýlega fundust sjúkraskrár mannsins og það sem þar kemur fram styður ákvörðun læknanna því maðurinn hafði látið skrá í sjúkraskrá að hann vildi ekki vera endurlífgaður.