Fyrrverandi prestur, hinn 85 ára gamli John Bernard Feit, var á fimmtudag sakfelldur fyrir að drepa 25 ára gamla fegurðardrottningu árið 1960.
Unga konan, Irene Garza, hvarf sporlaust þann 16. apríl árið 1960 og fannst lík hennar nokkrum dögum síðar. Krufning leiddi í ljós að henni hafði verið nauðgað en banamein hennar var kyrking.
Irene var á leið í kirkju þennan örlagaríka dag en svo vildi til að John var prestur umræddrar kirkju. Hann lá undir grun í málinu á sínum tíma, sagðist hafa hitt hana umræddan dag en þvertók fyrir að hafa orðið henni að bana.
Deild innan lögreglunnar í McAllen í Texas tók rannsóknina upp að nýju og töldu saksóknarar sig hafa nóg í höndunum til að sakfella prestinn fyrrverandi, sem var 28 ára þegar morðið var framið. Tveir prestar stigu fram og sögðu að John hefði játað á sig morðið fyrir margt löngu og þá vakti grunsemdir að munir í eigu Johns fundust skammt frá líkinu á sínu tíma.
Endanleg refsing hefur ekki verið kveðin upp en líkur eru taldar á því að John verði dæmdur í lífstíðarfangelsi fyrir morðið, 57 árum eftir að hann framdi það.