Einar Þór Sigurðsson hefur verið ráðinn aðstoðarritstjóri miðla Frjálsrar fjölmiðlunar, bæði netmiðla og DV. Einar hóf störf hjá DV sem blaðamaður í fréttadeild vorið 2007 en skömmu áður hafði hann lokið námi í fjölmiðlafræði við Háskólann á Akureyri. Einar hefur starfað fyrir net- og blaðaútgáfu DV allar götur síðan.

Einar var vaktstjóri hjá DV árin 2010 til 2014 að hann varð fréttastjóri.

Í vor varð hann aðstoðarritstjóri DV.is og Pressunnar en tekur nú til starfa fyrir alla miðla Frjálsrar fjölmiðlunar ásamt Kristjóni Kormáki Guðjónssyni sem ráðinn var aðalritstjóri miðla Frjálsrar fjölmiðlunar á dögunum.

„Það eru spennandi tímar í vændum hjá fyrirtækinu og ég hlakka mikið til að takast á við þær áskoranir sem fram undan eru. Ég þakka eigendum fyrirtækisins það traust sem mér er sýnt og mun leggja mitt af mörkum til að gera góða fjölmiðla enn betri í þágu okkar fjölmörgu lesenda. Hjá fyrirtækinu starfar hæfileikaríkt fólk og ég hlakka til komandi verkefna,“ segir Einar.

Á föstudag var greint frá því að Björn Þórir Sigurðsson hafi verið ráðinn til Frjálsrar fjölmiðlunar. Hann mun sinna þróunarvinnu fyrir félagið, bæði hvað varðar netmiðla og blað.