Tvær ungar dætur Maríu Erlu Guðmundsdóttur sögðu upp störfum hjá Nettó í Borgarnesi undir eins þegar það kom í ljós að verslunin hugðist einungis bjóða hluta starfsmanna í jólahlaðborð, og þær ekki þar með taldar. Í samtali við DV segir María Erla að svo virðist sem mismunun verslunarinnar á milli starfsmanna snúist ekki um hve lengi viðkomandi hafi unnið né hvort viðkomandi sé í fullu starfi. Eldri dóttir hennar hafi unnið í Nettó í þrjú ár.
„Hjá Nettó í Borgarnesi er starfsmannasjóður og í hann borga allir starfsmenn. Hluti starfsmanna stofnar svo „auka“ starfsmannasjóð sem að er haldið leyndu fyrir um helming starfsmanna. Fólkið í þessum „auka“ starfsmannasjóði ákveður að gera eitthvað skemmtilegt jólahlaðborð eða álíka. Einum nýjum starfsmanni boðið að borga sig inn og koma með en öllu er haldið leyndu fyrir hinum starfsmönnunum sem frétta af þessu frá fólki utan af sér,“ segir María Erla.
Hún segir að ef málinu hefði lokið þar þá hefði þetta verið leiðinleg framkoma af hluta starfsmanna en ekki ástæða til að segja upp störfum. Svo var hins vegar ekki. „Yfirmaðurinn sækir um styrk til fyrirtækisins og fær þann styrk. Fyrirtækið sem sagt borgar hluta af jólahlaðborðinu fyrir þessa útvöldu starfsmenn. Hinir eiga að fá pizzu seinna. Þegar að upp komst um málið af starfsfólkinu sem var ekki boðið komu yfirmenn í Nettó í Borgarnesi, Kristín þar á meðal, og töluðu við starfsfólkið. Þau sögðu þeim að dagvinnufólkið væri sko búið að leggja 110% vinnu á sig og ætti þetta svo sannarlega skilið. Spurningin er þá hvort hinir lögðu ekki 110% á sig líka?,“ segir María. Hún bætir við þetta að vissulega hafi dætur hennar aðallega unnið á kvöldin, enda á skólaaldri, en það afsaki ekki að mismuna starfsmönnum svo.
María segir enn fremur að viðbrögð yfirmanna hafi verið fyrir neðan allar hellur. „Þeim var í raun sagt að halda kjafti og sætta sig við þetta enda fengju þau pizzu seinna, eða þau gætu hætt. Dætur mínar hættu báðar og sonur minn sem hefur starfað þarna í nokkur ár og ætlaði að vera að vinna í Nettó Borgarnesi í desember sagði að það kæmi ekki til greina að vinna á stað sem mismunar starfsfólki eins og gert var þarna. Ég vona að ekkert fyrirtæki starfi eins og þetta. Alls staðar þar sem ég hef unnið hefur alltaf öllum verið boðið hvort sem að þeir eru í starfsmannafélagi eða ekki. Þeim sem eru ekki í starfsmannafélagi er boðið og greiða þeir þá fullt gjald eins og eðlilegt er. Það er lágmark að bjóða samstarfsfólki með, það hefur þá að minnsta kosti val um að afþakka,“ segir María.
DV gerði tilraun til að fá viðbrögð frá fyrirtækinu án árangurs. Þegar DV náði tali af fyrrnefndri Kristínu Ólafsdóttur verslunarstjóra þá vísaði hún á Hauk Benediktsson starfsmannafulltrúa. Hann vísaði á Hall Geir Heiðarsson rekstrarstjóra sem svaraði ekki í símann.
