Stórleikarinn Tom Hanks vandar Donald Trump ekki kveðjurnar og segir hann vera að eyðileggja upplýsandi fjölmiðla með stöðugum árásum sínum. Hanks sagði í viðtali á sjónvarpsstöðinni CNN um helgina að Trump væri að ýta undir lestur fólks á fölskum fréttasíðum sem hefðu annan tilgang en að upplýsa almenning: „Það er verið að sturta svo mikilli drullu og olíu í vatnið að það verður brátt ódrekkandi,“ sagði Hanks og vísaði til stöðugra ummæla Trump um að fréttir miðla á borð við CNN og New York Times séu fake news, eða falskar fréttir.
Hanks leikur í nýrri mynd, The Post, sem fjallar um birtingu Pentagon-skjalanna á sínum tíma þar sem sett var lögbann á fjölmiðla á grundvelli þess að skjölunum hefði verið lekið og vörðuðu við þjóðaröryggi. Hanks segir aðferðir Trump séu miklu verri en að leggja lögbann á fjölmiðla: „Þetta minnir á einræðisstjórnir, það er ekki lokað á fjölmiðlana heldur er dregið úr vægi þeirra með því að segja að það sé ekkert að marka þá. Við værum ekki Bandaríkin ef það væri ekki tjáningarfrelsi.“