Almennt hefur verið álitið að Katla hafi síðast gosið árið 1918 og telja margir að tími sé kominn á nýtt Kötlugos. Páll Einarsson prófessor telur hins vegar að Katla hafi gosið árið 2011, í flóðinu sem sópaði burtu brúnni yfir Múlakvísl.

Þetta kemur fram á Vísir.is. Þann 9. júlí árið 2011 varð hlaup undan Kötlu sem rauf hringveginn og skolaði burtu brúnni yfir Múlakvísl. Páll telur að þá hafi orðið lítið gos undir Mýrdalsjökli sem menn tóku ekki eftir af því það náði ekki í gegnum ísinn.

Páll segir að vísindamenn greini á um hvort gosið hafi í Kötlu árið 2011. Hins vegar bendi mælingar til þess að það hafi verið gos sem olli flóðinu.

Þá telur Páll að lítil leynigos hafi orðið í Bárðarbungu árið 2014 í undanfara Holuhraunsgossins.