Donald Trump Bandaríkjaforseti segir að það væri ekki svo slæmt að fá smá hnattræna hlýnun þar sem spáð er mjög köldu veðri á austurströnd Bandaríkjanna á Gamlárskvöld. CNN greinir frá því að Trump sé nú í jólafríi á Palm Beach að spila golf en þar er hitinn nú rúmlega 16 gráður en spáð er 11 stiga hita á morgun, 30. desember. Bandaríkjaforseti hefur verið eitthvað óhress með hitastigið og sagði á Twitter í gærkvöldi:

„Á austurströndinni þá gæti þetta orðið KALDASTA Gamlárskvöld sögunnar. Kannski væri bara gott að fá smá af gömlu góðu hnattrænni hlýnuninni sem við, en ekki önnur lönd, vorum að fara að borga BILLJÓNIR DALA til að berjast gegn. Klæðið ykkur vel!,“ sagði Trump á Twitter.

Bandaríkjaforseti virðist þarna vera að ruglast á veðri og loftslagi, en eins og NASA bendir á þá er veður aðstæðurnar í andrúmslofti jarðar til styttri tíma litið en loftslag er hins vegar hvernig andrúmsloft jarðar breytist til lengri tíma litið. Til að sjá hnattræna hlýnun þarf að skoða veðrið yfir langan tíma en fyrstu tíu mánuðir ársins voru þeir heitustu frá því mælingar hófust á níunda áratuga 19.aldar, aðeins eitt ár var heitara, það var árið 2016. Heitasta árið þar á undan var 2015 og þar á undan árið 2014.