Minnst 12 liggja í valnum, þar af eitt barn, og fjórir eru alvarlega slasaðir eftir eldsvoða í íbúðarhúsnæði í Bronx í New York-borg. Eldsvoðinn er sá versti í borginni í tvo áratugi og það tók rúmlega 170 slökkviliðsmenn til að ná tökum á eldinum.
Bill de Blasio borgarstjóri New York sagði að eins árs gamalt barn hefði farist í eldsvoðanum.
Eldurinn kviknaði í íbúðarblokk á Prospect-stræti nærri Bronx-dýragarðinum. Ekki er vitað út frá hverju eldurinn kviknaði en vitað er að hann kviknaði á jarðhæð og barst þaðan upp blokkina.
„Ég var bara sofandi uppi í rúmi þegar einhver bankaði á hurðina og öskraði að það væri eldur í húsinu. Ég veit ekki hvernig ég komst út, ekki í neinum sokkum, ekkert,“ sagði Thierme Diallo íbúi í blokkinni í samtali við New York Post.