„Ég fékk algjört áfall,“ segir Kristi Warner, lögfræðingur á Rhode Island í Bandaríkjunum, um augnablikið þegar hún áttaði sig á því hvaða efni voru í vinsælum andlitsfarða sem markaðssettur er fyrir börn. Sjálf á Kristi sex ára dóttur sem notað hafði farðinn.

Rannsókn leiddi í ljós að asbest var að finna í farðanum sem keyptur var í verslun Claire‘s og markaðssettur undir sama nafni.

Eins og kunnugt er er efnið asbest samheiti yfir nokkrar steintegundir sem mynda fíngerða kristalsþræði. Asbest var víða notað í heiminum til hitaeinangrunar í húsum en efnið hefur nú verið bannað í nær öllum löndum heims því það brotnar mjög auðveldlega niður og myndar asbestryk sem líkist litlum nálum. Við innöndun festist rykið auðveldlega í lungum.

Á löngum tíma getur asbestryk valdið miklum skaða í lungum sem kemur ekki fram fyrr en eftir nokkra áratugi og þá sem steinlunga, lungnakrabbamein eða fleiðrukrabbamein. Allir þessir sjúkdómar eru alvarlegir og er steinlunga til dæmis óafturkræfur.

Warner starfar sem lögfræðingur fyrir lögfræðifyrirtæki á Rhode Island, en umrætt fyrirtæki hefur tekið að sér mál sem lúta að asbestmengun og óæskilegum innihaldsefnum í snyrtivörum. Warner ákvað að kanna innihald farðans sem dóttir hennar notar og þá komst hún að því hann innihélt asbest.

„Maður gerir ráð fyrir að vörur ætlaðar börnum séu öruggar,“ segir Warner.

Claire‘s hefur brugðist við þessu með því að stöðva sölu á níu vörutegundum meðan á rannsókn stendur.