Ölvun, fíkniefnaneysla, nytjastuldur og líkamsárás
Ekki voru allir í jólaskapi aðfaranótt jóladags því talsverður erill var hjá lögreglunni á höfuðborgarsvæðinu. Alls voru sjö einstaklingar vistaðir í fangageymslu í þágu rannsókna ýmissa mála. Þar á meðal var nytjastuldur á bifreið, líkamsárás auk þjófnaðar. Að auki voru þrír vistaðir vegna þess að þeir voru ósjálfbjarga vegna ölvunar.
Þá reyndi ölvaður ökumaður að komast undan á flótta frá lögreglu. Fyrst akandi en síðan á fæti. Sem betur fer var enginn Usain Bolt þar á ferð og var hann handsamaður af vöskum laganna vörðum.
Þá ók annar ökumaður útaf við Reykjanesbraut, nærri Hafnarfirði. Engin slys urðu á fólki en ökumaðurinn er grunaður um akstur undir áhrifum fíkniefna.