Hjálparsamtökin Náunginn stofnuð
Gylfi Ægisson tónlistarmaður hefur notið mikillar velvildar og hjálpsemi frá því hann steig fram og sagðist vera húsnæðislaus en Gylfi býr á tjaldsvæðinu í Laugardal eins og margir aðrir húsnæðislausir um þessar myndir. Hefur framganga Gylfa beint athygli fólks í auknum mæli að brýnum vanda þeirra sem þurfa hafast við í tjöldum núna þegar
vetur er genginn í garð.
Margrét Friðriksdóttir tók upp myndskeiðið sem birtist hér að neðan en í því ræðir hún við Gylfa niðri í Laugardal. Kemur meðal annars fram að góðhjartaður maður úr Vestamannaeyjum hafi fært Gylfa nýjan fatnað og ætli að færa honum mat á næstunni.
Enn fremur kemur fram að tvær konur hafi boðið Gylfa húsaskjól sem hann hafi afþakkað: „En ég ætla að halda áfram að berjast hér með vinum mínum þar til við höfum unnið fullnaðarsigur,“ segir Gylfi sem krefst þess að fullnaðarlausn verði fundin á málum þeirra sem hafa ekki þak yfir höfuðið.
Margrét Friðriksdóttir hefur stofnað hjálparsamtökin Náunginn og opnað samnefnda heimasíðu. Er síðan meðal annars hugsuð sem tengiliður við þá sem vilja hjálpa þeim sem minna mega sín, til dæmis með fata- og matargjöfum. Gagnlegar upplýsingar er þegar að finna á síðunni en hún verður ekki að fullu komin í gang fyrr en á þriðjudaginn.
Margrét segist þegar finna mikinn með meðbyr með starfi samtakanna: „Ég er núna á leiðinni til góðrar konu sem hafði samband og ætlar að gefa slatta sf hlýjum fatnaði, ullarteppi og fleira,“ sagði Margrét í örstuttu spjalli við DV. „Við eigum helling af gôðu fôlki sem vill leggja sitt af mörkum.“