Rósa og Andrés sökuð um verkleysi og elítisma: „Þora ekki að takast á við vanda dagsins“

„Margir vinstri menn og stjórnarandstæðingar hafa orðið til þess að fagna afstöðu Rósu Bjarkar Brynjólfsdóttur og Andrésar Inga Jónssonar og hrósað þeim fyrir mikla skoðanafestu. Grunnafstaða þeirra er einfaldlega sú að vilja ekki vinna með Sjálfstæðisflokknum,“ skrifar Egill Helgason fjölmiðlamaður og stjórnmálarýnir á Eyjuna í gærkvöld.

Egill bendir hins vegar á að ekki séu allir þessarar skoðunar. Hann vitnar til Hallgríms Óskarssonar verkfræðings og stjórnarmanns í félaginu Gagnsæis sem hefur það að markmiði að opna stjórnmálin og gera þau gagnsærri. Hallgrímur segir afstöðu Andrésar og Rósu vera til marks um verkleysi og elítisma og gagnrýnir hann harðlega þennan pistil Andrésar, þar sem hann skýrir afstöðu sína. Hallgrímur skrifar:

„Andrési Inga finnst mörg atriði í stjórnarsáttmálanum mikilvæg en vill samt ekki samþykkja hann af því að sum atriði hafa áður verið í stjórnarsáttmála annarra stjórna og þá voru þau ekki öll sett í framkvæmd! Aldrei reyna sig við verkefni ef einhverjum í fortíðinni mistókst með þau sömu verkefni! Andrés hefur greinilega enga trú á sjálfum sér, né samstarfsfólki sínu í VG. Þetta er hreinn og klár „elítuismi“ og líka gott dæmi um þetta verkleysi sem hráð hefur margt fólk vinstra megin við miðju, að þora ekki að einhenda sér í verkin bara af því að hugsanlega væri það sniðugra seinna. Að þora ekki að takast á við vanda dagsins heldur fela sig á bak við kennisetningu um að nú sé e.t.v. ekki heppilegt að þurfa að fara að vinna og sýna hvað maður getur. Katrín hefur hins vegar unnið þvílíkt þrekvirki með vinnu sinni í kringum þessa stjórn, hefur náð aragrúa af „sínum“ málefnum í gegn og sýnt þvílíka leiðtogahæfileika í erfiðum viðræðum. Hún er greinilega sterkur samningamaður og mikill leiðtogi sem svarar kalli tíðarandans vel. Ég spái því að Katrín eigi eftir að verða farsæll forsætisráðherra og eigi eftir að sitja lengi. Og að þessi stjórn eigi eftir að sitja út allt kjörtímabilið.“

Hallgrímur segir enn fremur að ef Rósa og Andrés vilji koma hugsjónum sínum í framkvæmd þurfi þau að taka sér stöðu „meðal fólksins í landinu og byrja moksturinn,“ alveg eins og almenningur í landinu fer til vinnu sinnar á hverjum morgni:

„Elítuismi og verkleysi hefur loðað við margt vinstrafólk. Það er alþjóðleg þróun og er nefnd m.a. sem ein ástæða þess að Hillary tapaði. Ef Rósa og Andrés eru kappsöm um að koma hugsjónum sínum í framkvæmd fyrir Ísland þá ættu þau að byrja á að brjóta odd af oflæti sínu og setja af stað vinnu við fyrstu verkefnin sem þeim býðst að vinna að í þessari stjórn. Núverandi afstaða þeirra „ég ætla ekki að gera neitt ef Sjálfstæðisflokkurinn er líka í stjórninni“ er í besta falli barnaleg afstaða til þess raunveruleika sem blasir við eftir kosningar. Katrín er hins vegar að hugsa þetta rétt, að það sé betra að koma nokkrum af sínum málum í höfn nú heldur en að bíða eftir hugsanlegu tækifæri síðar. Því sá sem ætlar að bíða endalaust eftir hinni fullkomnu stund allra drauma til að einhenda sér í verkin mun þurfa að bíða ansi lengi, jafnvel lungann úr starfsævi venjulegs alþingismanns. Slíka hugsun geta fræðimenn tamið sér, í ýmsum vangaveltum en stjórnmálamaður sem hefur lofað að vinna fyrir þjóð sína verður að vinna úr þeim möguleikum sem bjóðast. Það er Katrín að gera nú og því er hún sumpart að innleiða nýja hugsun hjá vinstra fólki: Hugsun um vinnusemi, pragmatisma, klókindi og endurnýjuð tengsl við fólkið í landinu. Leggja aðeins minni áherslur á fræðilegar vangaveltur, inni í hlýjum glerhúsum, en byrja þess í stað að taka sér stöðu á meðal fólksins í landinu og „byrja moksturinn“, rétt eins og almenningur gengur til vinnu á hverjum degi.“

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.