Ilmur Eir Sæmundsdóttir, 27 ára nemi í dönsku, stendur nú fyrir söfnun á prjónavörum fyrir þá sem minna mega sín um jólin. Hún reynir nú að fá til liðs við sig sjálfboðaliða, bæði til að prjóna og til að gefa ónotaðan prjónaskap sem það á heima hjá sér. Til dæmis sokka, trefla, húfur og vettlinga. Bæði í fullorðins og barnastærðum. Nú þegar hafa nokkrir aðilar gefið prjónavörur og eru sjálfir byrjaðir að prjóna fyrir söfnunina.
Í samtali við DV segir Ilmur: „Síðustu tvö ár hef ég verið að hugsa um að gera eitthvað skemmtilegt um jólin fyrir aðra. En ég hef verið að ferðast mikið og ekkert komist í að gera neitt hingað til. Núna ákvað ég að láta loksins verða af þessu eftir að hafa fylgst með allri fréttaumfjölluninni um heimilislausa og hvað þeirra líf er erfitt. Það er leiðinlegt að sjá hversu margir þurfa að hafa áhyggjur um jólin á meðan við hin hugsum frekar um hversu stóran hamborgarhrygg við ætlum að borða. Mig langaði til að gera eitthvað fyrir þá sem minna mega sín og hvað er íslenskara en lopavettlingar, lopahúfur og eitthvað sem getur nýst fólki?“
Ilmur vonast eftir góðri þátttöku í verkefninu og stofnaður hefur verið Facebook hópur sem nefnist Prjónajól þar sem fólk getur haft samband. Afurðirnar verða svo gefnar Kvennaathvarfinu og Konukoti. Ef þátttakan verður góð vonast Ilmur til að geta gefið Gistiskýlinu við Lindargötu einnig.
„Ég er að keyra um höfuðborgarsvæðið og safna hjá fólki og svo pakka ég þessu inn rétt fyrir jól. Svo væri mjög gott ef matvælaverslanir eða aðrir myndu gefa konfekt eða annað jólalegt sem hægt er að setja í pakkana.“