Líklegir villikettir

Hvaða liðsmenn Vinstri grænna, Sjálfstæðisflokks og Framsóknarflokks munu reynast ríkisstjórninni erfiðastir?

Ef allt fer sem horfir mun ríkisstjórn Vinstri grænna, Sjálfstæðisflokks og Framsóknarflokks, undir forystu Katrínar Jakobsdóttur, sitja til ársins 2021. Þetta er í fyrsta sinn sem þessir flokkar sitja saman í ríkisstjórn en liðin eru 70 ár síðan Sjálfstæðisflokkurinn sat í ríkisstjórn með flokki lengst til vinstri ef undanskilin er ríkisstjórn Gunnars Thoroddsen í byrjun níunda áratugar síðustu aldar. Formenn flokkanna viðurkenndu á blaðamannafundi í Listasafninu í gær, fimmtudag, að flokkana greindi á um ýmis mál en stefnt væri að því að ýta ágreiningsmálum til hliðar og einbeita sér að málum sem flokkarnir væru sammála um. Jóhanna Sigurðardóttir, forsætisráðherra 2009–2013, átti í miklum erfiðleikum við að halda þingmeirihluta út kjörtímabilið og sagði þau frægu orð að ósamstíga meirihluti væri sambærilegur því að smala köttum. DV tók saman nokkur fyrirsjáanleg vandamál sem gætu krafist kattasmölunar.

Andrés Ingi og Rósa Björk - Líkur 75%

Fyrstu „villikettirnir“ í Vinstri grænum stigu fram áður en stjórnarsáttmálinn var undirritaður. Sagði Andrés að hann gæti ekki stutt stjórnarsáttmálann þar sem Vinstri græn væru ekki með nógu mikil áhrif. Þar að auki treysti hann ekki Sjálfstæðisflokknum miðað við það sem á undan væri gengið. Þó að Andrés og Rósa geti ekki fellt ríkisstjórnina þá taka þau tvö atkvæði, þá þarf aðeins tvö atkvæði til viðbótar til að fella ríkisstjórnina. Aldrei má þó útiloka að ef raunveruleg hætta steðjar að ríkisstjórninni verði þeim stillt upp við vegg og þau spurð hvort þau vilji í alvöru verða þess valdandi að Katrínu Jakobsdóttur verði úthýst úr Stjórnarráðinu.

Brynjar og Ásmundur - Líkur 50%

Brynjar Níelsson og Ásmundur Friðriksson, þingmenn Sjálfstæðisflokksins, eru ekki þekktir fyrir aðdáun sína á Vinstri grænum, langt því frá. Hægt er að sjá fyrir sér mál þar sem tilfinningar Vinstri grænna ganga í berhögg við kalda lögfræði, ef slíkt mál tengist hælisleitendum þá gæti komið til þess að bæði Brynjar og Ásmundur styðji ekki ríkisstjórnina. Flokkssvipa Sjálfstæðisflokksins er nógu öflug til að koma í veg fyrir að þeir muni greiða atkvæði með vantrausti en ef þeir verða stöðugt í vegi fyrir Vinstri grænum þá gæti það á endanum leitt til stjórnarslita.

Kolbeinn og Óli Björn – Líkur 35%

Kolbeinn Óttarsson Proppé, þingmaður VG, og Óli Björn Kárason, þingmaður Sjálfstæðisflokksins, eiga það sameiginlegt að tjá sig mikið og oft um hin ýmsu málefni. Slíkt er vissulega jákvætt til að skilja þeirra viðhorf og stefnu ríkisstjórnarinnar, en tjáningarþörfin getur verið tvíeggja sverð ef sjónarmið þeirra stangast á við ákvarðanir ríkisstjórnarinnar. Ef það gerist ítrekað þá er aldrei að vita nema annar hvor þeirra yfirgefi ríkisstjórnina af prinsippástæðum.

Páll Magnússon – Líkur 25%

Það er ekkert launungarmál að Páll Magnússon, oddviti Sjálfstæðisflokksins í Suðurkjördæmi, vildi verða ráðherra. Páll lýsti því yfir að þótt hann styddi ekki ráðherralistann þá myndi hann samt sem áður styðja ríkisstjórnina. Páll er 63 ára og verður því kominn á eftirlaunaaldur í lok kjörtímabilsins þannig að ef hann verður ráðherra þarf það að gerast fyrr en seinna. Ólíklegt er að Páll fari upp á sitt einsdæmi gegn ríkisstjórninni en ef stjórnarþingmönnum tekur að fækka á kjörtímabilinu er hættulegt að þurfa að reiða sig á kröfuharðan nefndarformann sem hefur engu að tapa.

Ásmundur Einar – Líkur 15%

Þinglið Framsóknarflokksins er ólíklegt til að verða til vandræða, allir kettir sem þurfti að smala í flokknum yfirgáfu hann fyrir kosningar. Eftir sitja malandi læður og fress stútfull af skagfirskum rjóma. Ásmundur Einar félagsmálaráðherra var hins vegar einn af köttunum sem Jóhanna talaði um forðum, en hann yfirgaf Vinstri græn árið 2011 og því gæti hann tekið upp á því aftur að yfirgefa ríkisstjórn, er það hins vegar ólíklegt á meðan ekki er stokkað upp í ráðherraliðinu.

Katrín Jakobsdóttir – Líkur 10%

Fjögur ár eru langur tími í stjórnmálum og miðað við gengi síðustu ríkisstjórna í skoðanakönnunum fyrstu mánuðina þá gæti ríkisstjórn Katrínar verið komin niður í 30% fylgi fyrir næsta sumar. Ef svo fer þá gæti bónorð Samfylkingar og Pírata um vinstristjórn undir forystu Katrínar byrjað að heilla. Erfitt gæti gengið að sannfæra Framsóknarflokkinn um að koma að slíku samstarfi og því gæti þurft að boða til nýrra kosninga. Sporin hræða hins vegar og þó að Vinstri græn, Samfylking og Píratar mælist samanlagt með 75% fylgi þá bendir reynslan til að fylgið verði komið undir 40 prósentin á kjördag.

Ung Vinstri græn - Líkur 85%

Það þarf líklegast ekki nema eitt vafamál tengt Sjálfstæðisflokknum eða Framsóknarflokknum til að ungliðar Vinstri grænna fari í stjórnarandstöðu. Eins og gengur og gerist með ungliða þá eru þeir óhræddir við hella sér út í erfiða umræðu og hafa ekki þingsætum að tapa.

Ungir Sjálfstæðismenn – Líkur 25%

Ólíkt ungliðum VG þá er Samband ungra Sjálfstæðismanna mun tengdara flokksforystunni og á meðan formaður flokksins styður ríkisstjórnina þá mun núverandi forysta SUS gera slíkt hið sama. Þó er möguleiki á að skipt verði um forystu meðal ungra Sjálfstæðismanna, og að stuðningsmenn mikilla skattalækkana og þess að draga úr umsvifum hins opinbera taki við.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.