Ríflega tvítug kona fékk óhugnanleg skilaboð frá karlmanni á fimmtugsaldri eftir að hún setti inn grín skilaboð á Facebook-hópinn „Kúrufélaga grúbban“. Maðurinn á að baki marga dóma meðal annars fyrir ofbeldi. Maðurinn segist vilja fá hana í leynilegt verkefni og því þurfi hann að „fá að prófa hana“.
Í skriflegu samtali við DV ber maður fyrir sig að þetta hafi verið ósmekklegt grín annars aðila, svokallað „facerape“, en maðurinn hætti að svara spurningum blaðamanns þegar honum var bent á að skilaboðin hafi átt sér stað yfir tvo mismunandi daga.
Unga konan setti inn færslu inn í fyrrnefndan hóp og spurði hvort einhver innan hópsins væri frímúrari. Maðurinn sendi henni þá einkaskilaboð, sagðist vera í Frímúrarareglunni og spurði hvað henni vantaði. Hún svaraði manninum og sagði strax að þetta hafi verið grín hjá henni, þó hún væri vissulega forvitin um samtökin. Þá skrifaði maðurinn: „Ég gæti notað manneskju sem þig við ýmis mál en þetta er algert leyndarmál. Þessi deild heyrir beint undir forsetann. Þú þyrftir samt að sanna þig með að hlýða skipunum sem ég gef þér.“
Konan spurði þá á móti hvernig skipunum. „Þetta er leyniþjónusta sem vinnur gegn hryðjuverkum og bara kynlífs þrælkun og notar algerlega nýjan órekjanlegan samskiptabúnað og það yrði þitt hlutverk að prófa þennan búnað en til þess þyrftirðu að vera tilbúin til þess að leggja ýmislegt á þig t.d. þú gætir þurft að nota kynlíf til þess að koma þér úr vandræðum eða til þess að fá upplýsingar en ég þyrfti að prufa að sofa hjá þér til þess að vera viss um að þú getir þetta en þú værir að bjarga litlum börnum frá því að lenda í að vera seld og nauðgað og gegn hryðjuverkamönnum sem svífast einskis. Hvenær get ég hitt þig til þess að taka af þér kynlífsprufu og tekurðu anal?,“ skrifaði maðurinn á móti.
Konan segir í samtali við DV að hún hafi ekki tekið þessu sem gríni. „Mér fannst þetta ekki vera grín, fannst eins og hann væri í alvöru að leita að einstakling sem er nógu fáfróður til að samþykkja þetta,“ segir hún. Skilaboðunum var deilt innan lokaðs hóps kvenna sem berjast gegn kynferðislegu ofbeldi. Þar kváðu sér hljóðs konur sem sögðust hafa lent í manninum og að hann væri mjög hættulegur.
Maðurinn á baki langan sakaferil en hann hefur tíu sinnum verið dæmdur í sakamálum. Nýjustu málinu eru vegna ölvunaraksturs en rétt fyrir aldarmót var hann dæmdur fyrir líflátshótanir. Á þeim tíma var honum lýst í fjölmiðlum sem síbrotamanni, bílasvikara og ofbeldismanni.
Líkt og fyrr segir hafði DV samband við manninn og sagðist hann koma af fjöllum. „Þetta er face rape frá einhverjum sem er með mjög lélegan húmor. Ég hef enga hugmynd um hvaða vitleysa þetta er,“ svaraði maðurinn.
