Fimm voru handteknir hér á landi og þrír úrskurðaðir í gæsluvarðhald í tengslum við rannsókn á umfangsmiklu fíkniefnamáli sem teygir anga sína til nokkurra landa; Íslands, Hollands og Póllands.

Þetta er meðal þess sem kom fram á blaðamannafundi sem lögreglan á höfuðborgarsvæðinu boðaði í Rúgbrauðsgerðinni í dag. Fundurinn var í beinni útsendingu á vef RÚV

Fundinn sátu, meðal annarra, Sigríður Björk Guðjónsdóttir, lögreglustjóri á höfuðborgarsvæðinu, og Kamil Bracha, rannsóknarlögreglustjóri Póllands. Sigríður sagði að málið snerti skipulagða alþjóðlega glæpastarfsemi.

Brotin sem lögregla hefur rannsakað varða meðal annars fíkniefnaframleiðslu og innflutning fíkniefna auk fjársvika og peningaþvættis. Kamil Bracha sagði að aðalmennirnir í málinu væru pólskir og þeir þekktir hjá pólskum lögregluyfirvöldum. Höfðu þeir áður hlotið dóma fyrir fíkniefnasmygl.

Grímur Grímsson yfirlögregluþjónn sagði á fundinum að rannsóknin snúi að innflutningi á amfetamínbasa. Úr honum hafi verið hægt að framleiða 50 til 80 kíló af amfetamíni. Þá hefði einnig verið um að ræða MDMA sem hægt hefði verið að framleiðla 26 þúsund töflur úr. Á fundinum kom fram að hinir handteknur hafi verið pólskir ríkisborgarar, búsettir hér á landi, og að efnin hafi verið ætluð fyrir íslenskan markað.

Á fundinum varpaði Zoltan Nagy, fulltrúi Europol, ljósi á umfang fíkniefnamarkaðarins í Evrópu. Sagði hann að þetta skuggahagkerfi velti allt að 40 milljörðum evra á ári hverju.