Heimsþekktur prófessor, David Nutt, telur að ekki muni langur tími líða þar til Vesturlandabúar verða nær allir hættir að drekka áfengi. Þetta geti gerst á næstu áratugum. David þessi er breskur sérfræðingur um vímuefnamál og starfaði lengi að þeim málum fyrir bresk heilbrigðisyfirvöld.

Nutt segir að breytingar séu að verða í vímuefnamálum; þannig séu rafsígarettur hægt og bítandi að taka við af hefðbundnu reyktóbaki og Nutt segir að það sama muni gerast varðandi áfengið.

Spáir hann því að áður en langt um líður muni nokkurs konar gerviáfengi, efni sem líkja á eftir áhrifum áfengis en er þróað og framleitt á rannsóknarstofu, ná undir sig markaðnum. Efnið muni ekki valda timburmönnum; höfuðverk og slappleika daginn eftir og af þeirri ástæðu verða vinsælla en hið dæmigerða áfengi.

„Eftir 10 til 20 ár held ég að íbúar á Vesturlöndum muni ekki drekka áfengi nema við mjög sérstök tilefni,“ segir hann við breska blaðið Independent og bætir við að áhrifin verði þau sömu og varðandi rafsígaretturnar. Útbreiðsla þeirra hefur aukist mjög á undanförnum árum enda þykja þær heilbrigðari kostur en tóbakið og öll aukaefnin sem því fylgja. „Tóbak og sígarettur munu hverfa alveg,“ segir hann.

Í umfjöllun Independent er þess getið að áfengi; áfengistengdir sjúkdómar og veikindi þar á meðal, kosti bresk heilbrigðisyfirvöld 3,5 milljarða punda á ári hverju.