Halldór Benjamín Þorbergsson, framkvæmdastjóri Samtaka atvinnulífsins, segir meðalheildarlaun flugvirkja hjá Icelandair vera 826.000 krónur á mánuði. Áður hefur komið fram að grunnlaun flugvirkja geta verið niður í 440.000 krónur.

Í viðtali við RÚV segir Halldór Benjamín að samninganefnd SA og Icelandair hafi reynt að koma til móts við flugvirkja og boðið ýmsar útfærslur af kjarasamningi. Halldór segir: „Flugvirkjafélagið hefur á sama tíma ekki dregið úr óraunhæfum launakröfum sínum, eins og ég hef kallað það, og því er staða viðræðna þar sem við erum stödd núna. Verkfall flugvirkja er því miður staðreynd. Og það þýðir að almannahagsmunum er fórnað í þágu sérhagsmuna lítils og vel skipulagðs hóps sem ítrekar misbeitir verkfallsvopninu. Við megum ekki gleyma því að þeir hafa boðað verkfall á um það bil 18 mánaða fresti á undanförnum árum.“

SA hefur metið kröfur flugvirkja upp á 20% launahækkun og segir Halldór þá stöðu vera óbreytta. SA muni ekki hvika í málinu.