Beate Uhse samsteypan í Þýskalandi var lýst gjaldþrota fyrir helgi eftir árangurslausar viðræður við lánardrottna. Beate Uhse er eitt þekktasta merkið í Þýskalandi í sölu unaðstækja ástarlífsins og framleiðslu klámfenginna kvikmynda. Stofnandinn Beate Uhse var fædd árið 1919 og á unga aldri gat hún sér orð sem listflugmaður.
Eftir síðari heimstyrjöldina opnaði Beate fyrstu kynlífstækjaverslunina í heiminum. Hún gaf út bæklinga með leiðbeiningum um kynlíf í hjónabandi og seldi smokka. Foreldrar hennar voru óvenjuopinská við börn sín varðandi kynferðismál og þetta uppeldi mótaði opinskátt viðhorf hennar og hispursleysi um kynlíf.
Smám saman byggði Beate Uhse upp stórveldi. Hún seldi unaðstæki í verslunum víðsvegar um Þýskaland og framleiddi klámmyndir.
Beate lést árið 2001 en um það leyti tók viðskiptaveldi hennar að hnigna. Útrás Beate Uhse samsteypunnar á erlenda markaði heppnaðist ekki vel og keppinautar fyrirtækisins náðu forystu á internetinu þangað sem meginhluti klámefnis tók að færast. Hefur fyrirtækið glímt við mikla rekstrarerfiðleika undanfarin ár þrátt fyrir yfirburði á Þýskalandsmarkaði. Núna er komið að endalokum.
Heimild: Der Spiegel
