Birgitta Jónsdóttir fyrrverandi þingmaður Pírata kveðst hætt afskiptum af pólitík í bili. Þá hefur hún dregið sig út úr öllum grúppum á Facebook þar sem umræða um samfélagsmál fer fram, þar á meðal Pírataspjallinu. Birgitta einbeitir sér nú að bókaskriftum og er að taka saman bók um móður sína, Bergþóru Árnadóttur.
„Kæru félagar. Ég ætla að hætta afskiptum af pólitík í bili. Gangi ykkur allt í haginn. Ekki verða eins og allir hinir,“ segir Birgitta. „Ég ætla því að fjarlægja mig úr öllum þessum grúppum en ef fólk hefur áhuga á að eiga í samskiptum við mig, þá er ég í símaskránni.“
Þá beinir Birgitta skilaboðum til fjölmiðlamanna og tekur fram að hún muni neita að vera álitsgjafi hvað varðar stjórnmál.
„Helstu ástæður þess eru eftirfarandi: Mér finnst ég ekki hafa neitt málefnalegt fram að færa,“ segir Birgitta og bætir við:
„Fyrst og fremst er ég að kafa í fortíðina fyrir bókina um Bergþóru Árnadóttur, mína mögnuðu mömmu sem hvarf af þessari jörð allt of snemma. Er með rosalegt deadline og verð að halda fókus sem er ekkert auðvelt fyrir fólk með athyglisbrest.“
Stefnir Birgitta á að mæta fersk á sviðið á nýju ári og láta þá sitt pólitíska ljós skína.
„Verum góð við hvert annað á þessum árstíma sem er þungur fyrir marga og kannski helst fyrir þá með fallegustu grímurnar.“