Lögreglan í San Francisco í Bandaríkjunum rannsakar nú andlát 23 ára konu, Chuchu Ma, sem fannst í San Francisco-flóa í síðustu viku. Cuchu var hugúnaðarsérfræðingur hjá Google og mikils metin hjá fyrirtækinu.

Í frétt NBC Bay Area kemur fram að Chuchu, sem hóf störf hjá Google í byrjun síðasta árs, hafi fundist nakin í flóanum á fimmtudag í síðustu viku. „Við vitum ekki hvort einhver varð vitni að einhverju en við höldum öllum möguleikum opnum,“ segir Shawn Ahearn hjá lögreglunni.

Ekki liggur því fyrir hvort Chuchu hafi verið ráðinn bani, hvort um slys hafi verið að ræða eða sjálfsvíg.

Lík Chuchu fannst skammt frá vinsælu útivistarsvæði en ekki liggur fyrir hvort hún hafi farið í sjóinn þar eða hvort líkið hafi rekið þangað. Það var kærasti konunnar sem tilkynnti um hvarf hennar og síðar þann sama dag fannst líkið. „Chuchu var frábær hugbúnaðarverkfræðingur,“ sagði Google í yfirlýsingu.