Aðalheiður hatar jólasveinana: „Ég lagði heilmikið á mig til að heilla þennan kallpung“

Aðalheiður Ámundadóttir, blaðamaður Fréttablaðsins og fyrrverandi starfsmaður þingflokks Pírata, segist á Facebook-síðu sinni hata jólasveinanna. Hún nefnir nokkrar ástæður fyrir þessu eins og að jólasveinarnir gefa börnum ríkra meira í skóinn.

„Hugvekja um jólasveininn; hataða persónu á mínu heimili. Ég hata jólasveininn. Í fyrsta lagi finnst mér fáránlegt foreldrar telji börnum trú um að þau eigi að vera þæg og góð því þá fái þau verðlaun frá skeggjuðum gömlum kalli sem komi að rúmstokki þeirra um miðjar nætur,“ skrifar Aðalheiður á Facebook-síðu sína.

Hún segir það neikvætt fyrir börn að upplifa það að nánast guðleg vera elski aðra meira. „Í öðru lagi mismunar jólasveinninn eftir félagslegum aðstæðum barna og það er hræðileg tilhugsun fyrir barn að nánast guðleg vera (jólasveinninn er í rauninni bara upphitun fyrir guðstrú) skuli sýna því minni elsku en öðrum börnum án nokkurs samhengis við hegðun þess, þvert gegn fullyrðingum foreldrana,“ segir Aðalheiður.

Hún segist þekkja þetta af eigin reynslu: „Ég var virkilega virkilega óþægt barn. Nema í desember. Ég var hjálpsemin uppmáluð heima við og herbergið mitt fínt og strokið alla daga þessa örfáu daga ársins sem jólasveinninn var á ferð. Ég lagði heilmikið á mig til að heilla þennan kallpung. En allt kom fyrir ekki. Ég fékk aldrei neitt í líkingu við það sem besta vinkona mín fékk frá jólasveininum. Yfir þessu grét ég sem barn og skildi ekki þetta óréttlæti af hendi bestu persónu í heimi. Mamma var alveg í öngum sínum líka og við eiginlega báðar fangar þessarar fáránlegu hefðar. Ég skora því á foreldra sem hafa efasemdir um þessa hefð að láta af allri meðvirkni og hætta að ljúga.“

Stöðufærsla hennar hefur vakið nokkra athygli og taka margir undir með henni. Þorfinnur Ómarsson, fjölmiðlamaður og sonur Ómars Ragnarssonar, segist aldrei hafa trúað á jólasveininn vegna föður síns. „Ég trúði aldrei á jólasveininn, missti eiginlega alveg af því dæmi, enda lék pabbi einn slíkan, svo ég fylgdist með honum fara í gervið frá því áður en ég man eftir mér. Finnst það eiginlega bara fínt, tómt rugl að reyna að plata börnin svona, einsog þú segir,“ skrifar Þorleifur.

Páll Winkel fangelsismálastjóri segir að jólasveinarnir væru best geymdir hjá sér og tekur Aðalheiður undir með honum. „Þá má velta fyrir sér hversu góðar fyrirmyndir þeir bræður eru miðað við lýsingar, t.d. gluggagægir. Hann ætti eiginlega að vera lokaður inni!,“ segir Páll.

Athugasemdir

Athugasemdir eru á ábyrgð þeirra sem þær skrá. DV áskilur sér þó rétt til að eyða ummælum sem metin verða sem ærumeiðandi eða ósæmileg. Smelltu hér til að tilkynna óviðeigandi athugasemdir.