Einn besti dómari Íslands vonar að hann fái hæli hér á landi
„Vonandi nær áfrýjunin hans í gegn hjá Útlendingastofnun og fjölskyldan fái hæli hér á landi. Að mínu mati væri það akkur fyrir samfélagið að fá svona fólk til landsins,“ segir Gunnar Jarl Jónsson, fyrrverandi FIFA-dómari, sem aðstoðað hefur ungan hælisleitanda, Twana Khalid, við að dæma leiki hér á landi.
Fótbolti.net fjallar um þetta.
Twana er 28 ára gamall og er frá írak, en hann hefur þrátt fyrir ungan aldur dæmt leiki í efstu deild írösku deildarinnar í fótbolta. Twana sótti um hæli hér á landi en var synjað þar sem hann kom frá Þýskalandi. Gunnar segir við Fótbolta.net að Twana eigi fjölskyldu; konu og tvö börn og það þriðja á leiðinni. Um sé að ræða fjölskyldu sem gæti vel komist inn í samfélagið hér á landi. Þá myndi hans þekking nýtast vel í íslenskri dómarastétt.
Gunnar segir að hann hafi komist í kynni við Twana í gegnum konuna sína sem starfar sem deildarstjóri í grunnskóla. Talið hafi borist að Twana og Gunnar, sem er einn besti knattspyrnudómari Íslands undanfarin ár, sett sig í samband við hann.
Úr varð að þeir hittust og síðan þá hefur Twana dæmt tvo leiki, annan í fjórða flokki og hinn í öðrum flokki. Gunnar segir að Twana sé góður dómari; hann hafi dæmt í írösku úrvalsdeildinni og setið námskeið á vegum FIFA í heimalandi sínu.
Gunnar segist að lokum vona að Twana og fjölskylda hans fái hæli hér á landi og bætir við að íslensk félög geti leitað til hans ef þau hafa áhuga á að komast í samband við Twana um dómgæslu.