„Ég hef alltaf verið á móti þessum kirkjuheimsóknum á aðventunni og í ár pantaði ég töframann til að skemmta krökkunum sem voru höfð eftir,“ segir Rökkvi Vésteinsson uppistandari, forritari og nú nýlega leiðsögumaður.
Árlega verða nokkrar deilur í samfélaginu um hvort réttlætanlegt sé að fara með skólabörn í kirkjuheimsóknir á aðventunni. Slíkar heimsóknir hafa lagst af í grunnskólum Reykjavíkur en tíðkast enn í Kópavogi.
Rökkvi á tvær stelpur, Laufey 8 ára og Emblu 6 ára, en þær eru í Snælandsskóla í Kópavogi. Þegar bekkirnir þeirra fóru í kirkjuheimsókn fyrir stuttu urðu þær eftir í skólanum ásamt örfáum öðrum börnum. Rökkvi fékk þá töframanninn Jón Víðis Jakobsson til að skemmta börnunum sem urðu eftir og eiginkona töframannsins, Regína Hrönn Ragnarsdóttir, tók þessar myndir við það tækifæri.
En hvers vegna er Rökkva illa við að börnin hans fari í kirkjuheimsóknir og myndir hann t.d. leyfa börnunum sínum að fara í mosku með skólanum?
„Nei, ég myndi leggjast gegn því. Það væri heldur ekki rétt að börnin færu í höfuðstöðvar Sjálfstæðisflokksins á þeim forsendum að þau ættu að læra um persónufrelsi eða einstaklingsframtakið. Það væri heldur ekki rétt ef heimsóknin væri til VG að læra um náttúruvernd eða til allra flokka að læra um einhver gildi sem þeir hafa, þó að það væru góð gildi og ég sammála þeim.“
„Ég myndi heldur ekki vilja að þau færu í trúarsöfnuði, íslamska, kristna, ásatrúar eða trúleysis-. Skólinn er opinber stofnun. Ég treysti kirkjunni líka ekki heldur til að vera með einhverja hlutlausa „fræðslu“.
Sitt sýnist hverjum um kirkjuheimsóknir skólabarna en víst er að Rökkvi leysti málið á sinn hátt og börnin voru hæst ánægð með heimsókn töframannsins. Af tillitssemi birtast aðeins dætur Rökkva með töframanninum á myndunum hér.
