Slobodan Praljak, króatískur stríðsglæpamaður sem tók eitur við dómsuppsögu í vikunni, var um skeið tengdafaðir Ásgeirs Friðgeirssonar. Ásgeir er fyrrverandi talsmaður Björgólfs Guðmundssonar. Hann segir í viðtali við Morgunblaðið að Slobodan hafi verið stór í öllu og aldrei hikað.
Það vakti talsverða athygli um heim allan þegar Slobodan fyrirfór sér í beinni útsendingu við dómsuppsögn í Stríðsglæpadómstólnum í Haag. Ásgeir er fyrrverandi tengdasonur Slobodan en hann var kvæntur Natasha Babic, fósturbarni hans. Ásgeir segist hafa kynnst Slobodan á árunum 1997 til 2003.
Í viðtalinu segir Ásgeir að það hafi ekki komið sér mikið á óvart að Slobodan hafi tekið eigið líf sitt á svo dramatískan hátt. „Ekki það að ég ætli að halda því fram að einhver hefði getað séð það fyrir að hann myndi enda líf sitt með þessum hætti,“ segir Ásgeir.
Ásgeir segist hafa hætt öllum samskiptum við Slobodan þegar hann var ákærður fyrir stríðsglæpi. „Hann var maður sem hikaði aldrei við að gera það sem þurfti að gera. Hann var mjög einbeittur,“ segir Ásgeir. Hann lýsir honum sem ákveðnum manni. „Hann var mjög fyrirferðarmikill alls staðar þar sem hann kom, var mikill athafnamaður, rak ýmis fyrirtæki og maður sem lét verulega til sín taka,“ segir Ásgeir.
[youtube https://www.youtube.com/watch?v=AdQsDopZfS4&w=560&h=315]
