Lögreglan í Los Angeles í Bandaríkjunum, LAPD, hefur staðfest að hún hafi nú til rannsóknar ásakanir leikarans Corey Feldman þess efnis að valdamiklir menn í Hollywood hafi tilheyrt barnaníðshring.

Feldman tilkynnti á dögunum að hann hygðist safna peningum fyrir heimildarmynd sem á að varpa ljósi á málið.

Ross Nemeroff, fulltrúi lögreglunnar í Los Angeles, segir við Hollywood Reporter að ávallt þegar slíkar ásakanir komi fram séu þær rannsakaðar. Feldman gaf lögreglu skýrslu um málið á mánudag og í kjölfarið hófst rannsókn lögreglu.

Feldman hefur á undanförnum árum tjáð sig um áreiti og kynferðisbrot valdamikilla karla í Hollywood á ungum og upprennandi leikurum. Í ævisögu sinni árið 2013 sagðist hann sjálfur og félagi hans, leikarinn Corey Haim heitinn, hafa orðið fyrir barðinu á níðingum í Hollywood þegar þeir voru yngri. Sagði hann að ofbeldið sem Haim varð fyrir hafi haft mikil áhrif á hann og í raun verið ástæða þess að hann lést langt fyrir aldur fram árið 2010, 38 ára aldri.

Feldman sagði á dögunum að hann væri að safna fjármunum fyrir heimildarmynd sem myndi afhjúpa níðingana í Hollywood. Hann gæti nefnt minnst sex nöfn, þar af einstaklinga sem enn eru valdamiklir í Hollywood.